Ek chhota sa gaon tha jahan ek purani aur tooti hui haveli thi. Gaon wale kehte the ki us haveli me raat ko ajeeb awaazein aati hain. Koi bhi raat me us haveli ke paas nahi jata tha.
Ek din Rahul naam ka ladka apne doston se bola, "Mujhe bhooton par vishwas nahi hai. Aaj raat main haveli ke andar jaunga."
Raat ke 12 baje Rahul torch lekar haveli me ghus gaya. Andar sab kuch purana aur dhool se bhara hua tha. Achanak upar se "thak… thak… thak…" ki awaaz aayi.
Rahul dheere-dheere seedhiyan chadhne laga. Uska dil zor-zor se dhadak raha tha. Jaise hi wo upar pahucha, usne ek purana kamra dekha jiska darwaza khula hua tha.Jab Rahul kamre me ghusa, usne dekha ki ek purani kursi apne aap hil rahi thi. Usne darr ke saath pucha, "Kaun hai waha?"
Achanak piche se thandi hawa chali aur kisi ne dheere se kaha…
"Tum yahan kyu aaye ho…?"
Rahul turant piche muda… lekin waha koi nahi tha.
Tabhi diwar par ek purani tasveer apne aap gir gayi. Rahul ne tasveer uthayi… aur use dekh kar uske hosh ud gaye.
Tasveer me jo ladka tha… wo bilkul Rahul jaisa hi dikh raha tha.
Aur tasveer ke niche likha tha:
"Yahan aane wala kabhi wapas nahi jata…"
Uske baad haveli se Rahul ki zor ki cheekh sunai di…Aur us raat ke baad Rahul kabhi gaon me wapas nahi dikha.