[الجزء الأول: العبقري اللي المملكة باعتُه!]
الحكاية بتبدأ بواحد اسمه "كاي". كاي ده من يوم ما نزل من بطن أمه وهو "ليفل وحش". عيل مش عادي، لسه بيفك الخط وعنده 3 سنين، بيقرأ كتب الكبار ويحل مسائل تعجز شيوخ المملكة. الناس في القرية بقوا يتصايحوا: "ده الفتى الذهبي!" "ده اللي هيرفع راسنا!".
عالم كاي ده عالم "مسحور"، والقوة هناك متقسمة: نار، مياه، رعد، ظلام.. لو طلعت بره الدائرة دي؟ يبقى ملكش دية، وأقرب "شلوت" يرميك بره المملكة. كاي وصل لسن الـ 8 سنين.. يوم "كشف المستور". القرية كلها واقفة، والكل مستني "نار" تطلع من جسم كاي.. وفجأة، العلامة تظهر فوق راسه: "ترويض حيوانات"!!
في ثانية، "العبقري" اتقلب "عبد". الناس اتقلبوا عليه والضحك اشتغل: "كل الذكاء ده وآخره يلم كلاب؟". الملك باعه لتاجر جشع اسمه "منصور"، واحد بخيل بياكل العرق والدم، شغل كاي ليل نهار في الشيل والحط.. وكاي كان صابر، لحد ما اليوم المنيل جه، ودخل عليه واحد قاله: "شد حيلك يا كاي.. أمك ماتت من قهرتها عليك".
هنا كاي "فيوزه ضربت". البراءة طارت من عينه، ونزل من السما "غراب بـ 3 عيون" (عين الملك) وسكن على كتف كاي بذكاء مرعب.. كأن كاي بقى هو "سيده" الجديد.
[الجزء الثاني: صدمة التاجر ولعنة الحرق!]
كاي بص للتاجر منصور ببرود يجمّد الدم وقاله: "الحيوانات خلاص مبقتش بتسمع للملك يا منصور.. الحيوانات دي بقت 'جيشي'!". ومن غير تفكير، كاي أمر الغراب: "هات حقي منه!". الغراب طار كأنه سهم مسموم عشان ينهش وش التاجر، بس منصور مكنش سهل، طلع ساحر مياه محترف، وبحركة واحدة رمى موجة مية "فركشت" هجوم الغراب ورمت كاي في الأرض.
منصور قرب من كاي وهو بيضحك شرير وماسك الكرباج: "أنت فاكر نفسك مين يا حتة عبد؟". كاي وهو مرمي، لقى جنبه خشب مولع، مسك خشبة وحدفها بكل غله في وش التاجر.. النار سابت علامة حرق في وش منصور مش هتتمسح العمر كله! كاي استغل الصويت وجري ناحية "الغابة المحرمة".
دخل وسط الشجر وهو بيعيط بحرقة على أمه، وفجأة سمع صوت في دماغه: "اهدا يا كاي.. أنا 'موكي' وهساعدك". موكي عرفه إنه في "المستوى الأول"، وقوته تخليه يسيطر على وحش واحد بس لمدة 5 دقايق. كاي كان هيموت من الجوع، بس لقى "فطر" صالح للأكل رده للحياة. وقرر يروح لمدينة "أركاديا" عشان يهرب من الظلم ويبدأ يجهز لنفسه طريق جديد