"Ek Average Student se Topper banne tak – Sarita ki kahani"
Mera naam Sarita hai. Main starting se hi ek average student rahi hoon. Na main kabhi class me top kiya, na hi logon ko mujhse zyada expectations thi. Lekin mere andar kahin na kahin ek sapna tha ki main bhi kuch achha kar sakti hoon.
Ek din mera result aane wala tha. Us din mujhe lag raha tha ki shayad main first, second ya third aa sakti hoon. Main kaafi excited thi aur thodi nervous bhi.
Lekin jab result announce hua, to main kisi bhi position par nahi aayi… main sirf pass ho gayi.
Us waqt mujhe bahut bura laga. Main bahut disappointed ho gayi. Maine apni mummy ki taraf dekha—wo mithai ka dabba lekar aayi thi, kyunki unhe poora yakeen tha ki main first aaungi. Unke chehre par sadness dekh kar mujhe aur zyada bura laga.
Tabhi meri teacher ne mujhe dekha aur bulaya. Unhone kaha,
"Tum mithai layi ho to baant kyun nahi rahi?"
Maine himmat karke sab teachers ko mithai di. Sab mujhse poochne lage,
"Tum kaunsi position par aayi ho?"
Maine halka sa smile karke kaha,
"Main bas pass ho gayi hoon."
Wahi moment meri life ka turning point ban gaya.
Us din ke baad maine decide kiya ki ab main sirf average student bankar nahi rahungi. Maine din-raat mehnat karni shuru kar di. Jab bachche playground me khelte the, tab main padhti thi. Main raat ko bhi der tak padhti thi.
Dheere-dheere meri mehnat rang laane lagi.
Phir exams aaye… aur maine bahut achha perform kiya. Mere marks bahut achhe aaye. Board exams me maine 91% score kiya aur plus one me main first position par aayi.
Aaj main samajh paati hoon ki wo ek din ki failure hi meri success ki shuruaat thi.
Lesson:
Kabhi bhi ek result se apne aap ko judge mat karo. Mehnat aur dedication se koi bhi average student topper ban sakta hai.