Meri zindagi ke samjhote
Mujhe apni 10 saal ki age me hi aisa lagne lga tha ki mujhe study me koi interest nhi hai. Shayad mera interest dance me hai aur shayad main mackup artist banna chahti hu, lekin main ek conservative family se belong karti thi jaha par dance ko ek kala nhi mana jata tha. Dance ko bilkul bhi achcha nhi samjha jata tha. Mere parents hamesha kehte the ki dance karne walo ko log izzat ki nazar se nhi dekhte hai aur tum ek ladki ho aur jab main mackup artist banne ki baat karti to mere parents bolte ki ye nai wala kaam hai is kaam main bhi koi izzat nhi hai beta izzat to sirf isme hai ki aap apni study me dhyan de aur pad likh kar ek koi achchi job kare. Bas phir kya tha mujhe parents ke aage jhukna pada aur mera pehla samjhota mujhe ye karna pada ki jis profession me mera interest tha usko chhodkar mujhe jabardasti na chahte hue bhi padai par focus karna pada. Aur uska natija ye hota tha ki mere hamesha marks kam hi aate the. Mera study me interest na hone ki wajah se meri ginti class ke weak student me hoti thi jo mujhe mentally ye sochne par majboor karta tha ki shayad main kam dimag hu mere andar dusre bachcho jitna dimag nhi hai ya phir shayad me padai me budhhu hu.